Seis concellos da provincia de Lugo – Sober, Begonte, Ribadeo, Ribeira de Piquín, Portomarín e O Vicedo – elaboraron plans de emerxencia ante situacións de seca a partir dunha convocatoria de axudas polas que a Xunta de Galicia destinou un total de 73.300 euros nos últimos dous anos.
O delegado territorial de Lugo, Javier Arias, lembrou que actualmente está aberta unha nova convocatoria deste programa que xestiona a Consellería de Infraestruturas e Mobilidade a través de Augas de Galicia, e os concellos interesados teñen de prazo ata o vindeiro 4 de xuño para presentar as solicitudes.
Os municipios que accederon ás achegas o pasado ano, segundo informan nun comunicado, foron os de Sober e Begonte, que recibiron 14.000 euros en cada caso; Ribadeo (10.800 euros) e Ribeira de Piquín (14.500 euros). No 2019 recibiron axudas Portomarín e O Vicedo, por importes de 8.000 e 12.000 euros respectivamente.
Estes plans constitúen “os instrumentos básicos de planificación das administracións responsables dos sistemas de abastecemento á poboación para xestionar os episodios de
seca”, informa a Delegación Territorial. Entre outros aspectos, determinan cales son as zonas máis vulnerables en caso de seca e os usos da auga máis relevantes desde o punto de vista económico e social, coa identificación da poboación, dos condicionantes ambientais ou dos principais elementos do patrimonio natural e das actividades estratéxicas que se poderían ver afectados. Tamén indican as medidas de xestión que se adoptarán en caso de necesidade e a previsión dunha subministración alternativa ante situacións de escaseza.
