A vicepresidencia da Deputación de Lugo pon a “arrancadeira” á VI Foliada da Fonsagrada, cos concertos de Habelas Hainas, na madrugada do sábado ao domingo, ás 2.40 horas, e Fransy, Davide e Cibrán, o domingo ás 20.00 horas.

Coa organización destes concertos, a área de Cultura colabora coa asociación Petapouco e A Destempo, na programación da Foliada, que inclúe máis música, obradoiros de baile, presentacións de libros, proxeccións, unha mostra de artesanía, roteiros e unha homenaxe a Florencio dos Vilares e Modesta de Noceda.

A vicepresidenta da Deputación de Lugo, Maite Ferreiro, sinalou que “colaborar” coa organización deste evento, pon en valor o noso patrimonio material e inmaterial, e que ten detrás xente moza comprometida coa nosa cultura

PROGRAMACIÓN VI EDICIÓN FOLIADA

O venres 3 de decembro, ás 11 horas ten lugar un roteiro polas montañas, neste caso polo Muín do Penallo e por Castro de Castañoso; e á noite as 21.30 horas hai unha cea para recuperar os folgos.

O sábado 4, ás 11 horas é a apertura da Foliada e as respectivas homenaxes a Florencio dos Vilares e Modesta de Noceda. Posteriormente, ás 12 horas é a presentación do proxecto Avareira e un pasabares cós grupos Kalandracas e A Musicleta.

Á tarde, destaca o cine na Vila ás 16.30 horas, un obradoiro de baile tradicional ás 17 horas; e por último á noite chegan os pratos fortes do día cós concertos de Xavier Díaz& Adufeiras de Salitre, Galicia Fiddle e os D’Abaixo ás 22.30 horas e a actuación das “arrancadeiras” Habelas Hainas ás 2.40 horas.

Por último, o domingo 5 de decembro, pola mañá ten lugar un obradoiro sobre Florencio dos Vilares ás 11 horas. Pola tarde hai a presentación do libro O toque pechado ás 18 horas; os concertos das “arrancadeiras” Fransy, Davide e Cibrán as 20 horas; e unha butelada popular ás 22 horas.