A conselleira de Infraestruturas e Mobilidade, Ethel Vázquez, urxiu ao Goberno a responder as tres alternativas de tráfico propostas pola Xunta para o tramo afectado polo derrube no viaduto do Castro, na A-6.
“É inexplicable que a Xunta tarde menos en trazar tres altenartivas que o Goberno en decidir sobre elas”, espetou a conselleira este mércores, véspera da reunión entre os gobernos central e autonómico para estudar alternativas de mobilidade na zona afectada pola caída de dous vans do viaduto que conecta as provincias de León e Lugo.
A conselleira respondeu desta forma a unha pregunta presentada polo deputado do PP José Balseiro durante o pleno do Parlamento galego, onde manifestou que o Goberno debe ofrecer “solucións” este xoves á situación xerada na A-6.
Sobre a mesa estarán as tres propostas elaboradas pola Xunta: a construción dun ramal que conecte a N-V e a A-6 cun custo de 1,46 millóns de euros, a creación dunha variante en Pedrafita para transportes especiais (150.000 euros) e, por último, habilitar en dobre sentido de circulación o ramal de saída da A-6 en sentido Galicia, de modo que os vehículos se poden reincorporar á autovía antes dos túneles de Pedrafita.
“A ver se mañá ofrecen solucións”, aseverou Vázquez, que tamén respondeu, a solicitude do grupo que sustenta ao Goberno autonómico, sobre a sentenza que exime á Administración autonómica do pago das peaxes en sombra de Rande e A Barcala na AP-9. A responsable de Mobilidade manifestou a súa satisfacción por un fallo xudicial que supón “un gran alivio para as arcas públicas” ao “aforrar 400 millóns á poboación galega de aquí ao final da concesión”.
Así mesmo, Vázquez tamén tivo que ofrecer explicacións sobre a postura crítica da Xunta co mapa de transportes elaborado desde o Executivo central, un posicionamento que foi cualificado pola deputada socialistas Patricia Otero como “unha nova confrontación” co Goberno a través do uso “torticeiro” do documento. “Non me pida que apoie un plan de transportes que mesmo rexeitan membros do seu partido”, respondeu a conselleira, en alusión á postura do PSOE de Betanzos (A Coruña).
