Rescatan un condutor que envorcou en Cervantes

O coche envorcou e quedou na cuneta coas rodas no aire, dificultando o rescate do condutor, ferido pero sen risco vital

(Arquivo) GES de Becerreá nun operativo por un coche envorcado
(Arquivo) GES de Becerreá nun operativo por un coche envorcado

Un condutor tivo que ser rescatado logo de quedar atrapado no interior do seu vehículo en Cervantes. Tal e como informou a Axencia Galega de Emerxencias (Axega), o único implicado envorcou e quedou na cuneta ao paso polo lugar de Vilaluz.

A raíz do aviso dun veciño, o 112 Galicia foi mobilizado contra as 22.30 horas do xoves, nun operativo no que compareceron efectivos do GES de Becerreá, voluntarios de Protección Civil e axentes da Garda Civil. Atoparon o coche coas rodas no aire.

Esta situación impedía precisar o estado do condutor, polo que a intervención dos especialistas sanitarios contou cun equipo de rescate de emerxencias. Foi indispensable a colaboración do Grupo de Emerxencias Supramunicipal, que procedeu á excarceración do único ferido.

A axencia Efe informou de que o condutor, J.P.P., de 75 anos e ferido de consideración, foi trasladado ao Hospital Universitario Lucus Augusti (HULA) de Lugo. As labores de rescate prolongáronse ata pasada a medianoite.

DEIXAR UN COMENTARIO

Please enter your comment!
Please enter your name here