A cabeza de lista do PSOE ao Congreso na provincia de Lugo, José Ramón Gómez Besteiro, puxo en valor este sábado as axudas do Goberno ás pallozas de Piornedo e criticou que a Xunta, “que ten as competencias, mire para outro lado”.

“As 16 pallozas de Piornedo seguen en pé grazas á perseveranza destes veciños, á colaboración do Concello de Cervantes e ás subvencións da Deputación de Lugo. Se é pola Xunta, este conxunto arquitectónico admirado en todo o mundo non existiría, están a pór en perigo máis de 21 séculos de historia”, manifestou.

Gómez Besteiro mantivo unha reunión con parte da xunta directiva da Asociación ‘Teitos de Piornedo’, unha agrupación formada por veciños de seis casas do pobo que traballa de forma desinteresada por conservar “non só estas históricas edificacións, senón tamén todos os recordos e historias que albergan”. Alí, o candidato socialista destacou que no últimos catro anos a Deputación destinou máis de 150.000 euros a este conxunto arquitectónico, único en Europa, a maior parte procedente de fondos europeos.