Máis de 500 persoas están xa inscrutas para participar na segunda edición da Ancares Cycling Marathon, que se celebrará o domingo 7 de agosto nas estradas da comarca co apoio da área de Deportes da Vicepresidencia da Deputación de Lugo e que abrirá, co dorsal número 1, ninguén menos que Miguel Induráin.
Ademais da presenza de ciclistas de toda Galiza, e doutros puntos do
Estado – Castilla y León, Asturias, Madrid, Cataluña, Euskadi, Navarra,
Aragón e Canarias, medra tamén a participación internacional con
inscricións de Suíza, Reino Unido, Irlanda ou Portugal.
A posibilidade de rodar a carón de deportistas como Miguel Induráin,
cinco veces campión do Tour de Francia, ou o triatleta Iván Raña,
campión do mundo de triatlón, é un dos grandes reclamos da proba, que se
presenta como unha plataforma de proxección da comarca dos Ancares como destino para o turismo deportivo.
Así, o deputado de Deportes Efrén Castro valorou “esta segunda edición como a consolidación desta proba, pola que apostamos coa vontade de poñer en valor as excepcionais condicións da comarca para o ciclismo; de cara á organización de eventos deste tipo, cunha proxección mediática
importante, pero tamén de cara a reforzar Ancares como destino de rutas
e quedadas de afeccionados e afeccionadas durante todo o ano”.
A proba, organizada polo Club Cliclista Cidade de Lugo co apoio da
Vicepresidencia da Deputación de Lugo, terá a saída e a meta en
Pedrafita do Cebreiro e pasará tamén polos concellos de Becerreá, As
Nogais, Cervantes e Navia de Suarna. Haberá tres itinerarios, con distintas distancias e niveis de dificultade para facilitar a participación de persoas afeccionadas ao ciclismo de todas as idades e condicións físicas.
