A corguesa Benedicta Sánchez será homenaxeada o vindeiro 4 de febreiro no Pazo de San Marcos, a partir das 17:30 horas.
A vicepresidenta provincial, a nacionalista Maite Ferreiro, anunciou que xa se fixara a data do evento, no que se prevé honrar a figura de Benedicta Sánchez tras gañar o Premio Goya a Mellor Actriz Revelación polo seu papel en ‘O que arde’.
“Con este recoñecemento a Benedicta tamén queremos facer un recoñecemento a todo o equipo da película, que puxo no punto de mira a situación da comarca da Montaña“, salientou Maite Ferreiro. “Tamén queremos destacar a figura de Benedicta, unha muller do rural, dunha parroquia do Corgo. Unha muller que tivo que emigrar, unha muller que foi unha pioneira no seu tempo e que agora volve ao seu lugar de orixe”.
O acto celebrarase na sala de exposicións do pazo provincial e será aberto ao público.
