A Confederación Intersindical Galega (CIG) denunciou os despedimentos efectuados pola empresa Luis Iglesias Carreira SL, concesionaria do servizo de transporte sanitario urxente en varios concellos da provincia de Lugo e á que tamén acusa de incumprir obrigas laborais e sanitarias cos seus empregados.

Este luns, o sindicato realizou unha concentración ás portas do Servizo de Mediación Arbitraxe e Concialiación (SMAC) de Lugo, onde tivo lugar un acto de conciliación polo despedimento dunha traballadora de Navia de Suarna.

Segundo a CIG, esta adxudicataria (que presta o servizo en Lugo, Navia, Becerreá, Vilalba, Palas de Rei, Guitiriz e Pedrafita) decretou “varios despedimentos desde que foi asumida a empresa a través do empresario Rubiero-Xirón”.

INCUMPRIMENTOS SANITARIOS

Para a central nacionalista, a compañía “non está a asumir puntualmente as súas obrigas salariais e segue incumprindo as garantías en materia de saúde laboral”, en concreto, no relativo á uniformidade e a desinfección.

Así as cousas, a CIG tacha esta situación de “inaudita” e asegura que a “única contestación” da empresa é “asumir despedimentos de persoal co diñeiro dos novos contratos da Fundación Pública de Urxencias Sanitarias 061”.

FUNDACIÓN URXENCIAS SANITARIAS

Pola súa parte, a Fundación Pública Urxencias Sanitarias de Galicia-061 saíu ao paso da denuncia efectuada pola CIG e asegura que as relacións laborais entre Luis Iglesias Carreira e o seu cadro de persoal “constitúen un asunto estritamente privado”.

Así, fontes de Urxencias Sanitarias indican que son “responsabilidade exclusiva” das concesionarias tanto o “mantemento das condicións sociosanitarias e de saúde laboral no lugar de traballo” como “as retribucións” para os empregados.

Neste sentido, lembra que leva a cabo tarefas de seguimento do contrato de prestación do servizo e realiza inspeccións periódicas das unidades asistenciais de soporte vital básico e avanzado.