O vicepresidente segundo da Xunta en funcións, Francisco Conde, instou este mércores ao Goberno central, á Deputación de Lugo e ao Concello a “traballar conxuntamente” e a emprender unha “axilización administrativa” dos trámites necesarios para que a compañía portuguesa Altri tome leste mesmo ano a “decisión final” de instalar a súa planta de fibras téxtiles no municipio de Palas de Rei, como xa anunciara. Unha reclamación que coincide coas denuncias de plataformas ecoloxistas apuntando á afectación ambiental da planta, que cualifican de “nova ENCE”. 

Así o manifestou o tamén conselleiro de Economía, Empresa e Innovación en funcións, Francisco Conde, ao comezo dunha reunión co sector forestal na Cidade da Cultura de Santiago para presentarlles este proxecto. Tamén asistiron o conselleiro delegado de Altri, José Soares de Pina, o conselleiro de Medio Rural en funcións, José González, e a directora xeral da Sociedade Impulsa Galicia, Enyd López.

Segundo o conselleiro, a planta de Altri en Pas –que previsiblemente empezará a operar en 2024 ou 2025– xerará “novas oportunidades non só de xeración de emprego de calidade”, cos 2.500 postos directos e indirectos que se prevé crear, senón tamén de “capacidade de dixitalizar o conxunto da industria forestal e promover proxectos innovadores” que atraian á Comunidade “novas investimentos” relacionados co téxtil. Non se pronunciou, pola contra, sobre as denunciadas afectacións ambientais.

“Temos que agradecerlle a Altri a confianza que está a ter en Galicia, que está a trasladar a todo o tecido produtivo”, insistiu o vicepresidente segundo en funcións, para seguidamente reclamar ao resto de administracións e ao sector que traballe “conxuntamente” para que a factoría “poida ter éxito”.

O PAPEL DO EUCALIPTO

Desde o punto de vista da Xunta, Francisco Conde confirmou que, cando o seu departamento reciba a solicitude, tramitarao como “proxecto industrial estratéxico”, o que permite axilizar os prazos. Iso si, engadiu, o procedemento será “garantista desde o punto de vista de toda a avaliación de impactos”.

Pola súa banda, o CEO de Altri subliñou a “oportunidade importante” que supón este proxecto “estratéxico para Galicia pero tamén para España”, xa que pode “agregar toda a cadea de valor” dos clústeres forestal e téxtil. Con todo, recalcou que a “decisión final de investimentos” tomarase “a final de ano”.

Así mesmo, ante as preguntas da prensa, Soares de Pina confirmou que “gran parte” da madeira empregada na factoría para obter a fibra téxtil será “de eucalipto”, porque é “a máis adecuada”. Sobre a posibilidade de empregar especies autóctonas, a empresa estudarao se “poden achegar valor” ao produto final.