O senador do PP e número un á Cámara Alta por Lugo José Manuel Barreiro mostrou este venres o seu “agradecemento” á dirección de Pablo Casado por deixarlle repetir como candidato e formar parte dos denominados senadores “do 155”. Neste contexto, acusou a Pedro Sánchez de estar disposto a “vender España aos independentistas a calquera prezo”.
Barreiro, que vai pola quinta lexislatura consecutiva –incluída a breve de 2015 a 2016–, agradeceu ao partido “tanto a nivel provincial e á presidenta Elena Candia, a nivel rexional e a Feijóo e á dirección nacional con Pablo Casado á fronte por confiar unha vez máis nel “para asumir esta responsabilidade“. “Unha responsabilidade que me enche de orgullo e satisfacción o traballar desde unha cámara que sempre foi decisiva e neste momento moito máis”, aseverou.
Sobre o artigo 155 da Constitución e a súa aplicación en Cataluña, o que foi portavoz do PP no Senado ata o pasado xullo lamentou que “en España se está dando unha situación que é dantesca, dramática”, no sentido de que o Goberno está “presidido por un señor que está disposto a vender a España aos independentistas e esta disposto a facelo a calquera prezo”.
“Nas próximas eleccións xerais está en xogo se apostar por un partido que ten acreditado o seu compromiso coa soberanía nacional, coa igualdade e a unidade de España, e ese é o Partido Popular e ese é Pablo Casado”, presumiu.
Finalmente, Barreiro alertou que “desde o punto de vista económico a situación está a complicarse cada día“. “Estamos a entrar nunha fase de recesión económica. É necesario que volva a seriedade ao Goberno de España e esa estabilidade só garántea Pablo Casado e o Partido Popular”, reivindicou finalmente.
