O secretario xeral do PSdeG, José Ramón Gómez Besteiro, aproveitou a súa presenza na tradicional pulpada que celebran os socialistas en Lugo para pedirlle ao electorado que se “implique” coas eleccións xerais do 29 de novembro e volver optar ao segundo deputado pola provincia.
A comida coa que o PSOE lucense pecha cada ano o San Froilán rexistrou esta vez a maior participación da súa historia, segundo o partido, “con militantes e simpatizantes chegados de toda a provincia”. Este foi o primeiro acto de Besteiro en Lugo durante a precampaña e, por tanto, “o punto de partida da mobilización socialista” neste territorio.
En declaracións aos medios previas, a súa mensaxe centrouse en pedirlle aos “votantes progresistas” que concentren o seu apoio na candidatura que encabeza Patricia Otero para o Congreso, e a de César Mogo, no Senado. Considera que Lugo é “clave” nesta carreira electoral ao volver ver ao alcance o segundo escano na circunscrición, que xa obtiveron en 2019.
“Fai catro anos, o Partido Socialista quedou a só 3.000 votos de conseguir ese segundo deputado. Esa é a nosa marca que queremos instalar o próximo 29 de novembro”, fixou. Dirixíndose a quen queiran “manter e seguir impulsando” o modelo de “ampliar e construír dereitos” que promulga o seu partido –nas súas palabras–, “a papeleta ten que ser a do PSOE”, dixo.
Falando cara a estas mesmas persoas, advertiu que “outras opcións non van poder chegar”, aínda que “si que poden dar o impulso que necesita a candidatura socialista”. Para apoiarse, remitiuse aos datos do 2023: “Triplicamos en votos ao Bloque Nacionalista Galego (BNG) e multiplicamos por seis os votos que tivo Sumar na papeleta do Congreso”.
CRÍTICAS Á “MOTOSERRA” DE FEIJÓO
Besteiro tamén dirixiu boa parte da súa intervención contra o líder do PP, Alberto Núñez Feijóo. Rescatando a intervención do popular en Vigo, respondeulle apelando á “memoria”: “Sabemos perfectamente o que fixo aquí mentres gobernou”. Reprochoulle “non preocuparse” de construír vivenda pública nos seus anos á fronte da Xunta e enmarcou a súa nova promesa dun millón de vivendas nunha “carreira aloucada, absolutamente inconsciente”.
Ademais, o socialista presentou o 29N como unha elección entre dous modelos. Ao seu xuízo, o do PP “é o modelo da motosierra, que vai actuar sobre as pensións, sobre os salarios dos traballadores, ese recorte permanente de dereitos”. Fronte a el, situou o dos socialistas, “un modelo de ampliar e de construír novos dereitos”, no que a vivenda pasará a ser “un novo alicerce do estado do benestar”.
