Un camioneiro resultou ferido este martes tras sufrir unha saída de vía e caer por un terraplén duns 15 metros na AG-64, ao seu paso polo municipio lucense de Xermade.
Segundo subliñou o 112 Galicia, o sinistro produciuse ao redor das 13.00 horas, á altura do quilómetro 48, na parroquia de Candamil e en sentido Vilalba.
A Central recibiu o aviso a través da chamada dun particular, que alertaba da saída de vía do vehículo sen poder confirmar se o condutor permanecía atrapado no interior da cabina.
De inmediato, o Centro Integrado de Atención ás Emerxencias mobilizou aos Bombeiros de Vilalba, ao Servizo de Urxencias Sanitarias de Galicia-061, a Garda Civil de Tráfico e aos efectivos de Protección Civil.
Unha vez no lugar, os bombeiros comprobaron que o camión descendera polo terraplén impactando contra varias árbores, que actuaron como freo natural e reduciron a velocidade do vehículo ata deter completamente a marcha. A cabina quedou finalmente inclinada e apoiada sobre o arboredo da zona.
A chegada dos equipos de intervención, o condutor atopábase consciente e non foi necesario realizar labores de excarceración. Con todo, os efectivos de rescate tiveron que portear ao ferido durante uns 50 metros ata a autovía, onde recibiu atención por parte do persoal sanitario.
