O Concello de Vilalba continúa avanzando na mellora da rede viaria municipal do rural coa incorporación, desde a pasada semana, de dous equipos do parque móbil da Deputación de Lugo destinados á rexeneración de pistas municipais. Concretamente, un dos equipos está especializado na apertura e limpeza de cunetas, mentres que o segundo realiza traballos de riego e rexeneración do firme dos viais.
Nestes momentos, o equipo encargado da rexeneración do firme está actuando nun vial do barrio de Moreda, na parroquia de Lanzós, unha pista municipal con acceso directo desde a estrada provincial LU-P-6502 que dá servizo a varias vivendas e que presentaba un notable deterioro.
A alcaldesa de Vilalba, Marta Rouco, destacou que “estas actuacións permiten seguir mellorando progresivamente a rede viaria municipal do noso rural, dando resposta a necesidades importantes dos veciños e veciñas das parroquias”.
Rouco sinalou ademais que “falamos de pistas fundamentais para o día a día da veciñanza, tanto para os desprazamentos habituais como para a actividade agrícola e gandeira”.
De forma paralela, o equipo encargado da apertura e limpeza de cunetas está centrando actualmente os seus traballos en dous viais municipais da parroquia de San Simón da Costa, concretamente nos barrios de Pude e Ribeira, actuacións previas á rexeneración do firme destas pistas.
A rexedora puxo en valor a colaboración institucional coa Deputación de Lugo, que permite ao Concello contar por terceiro ano consecutivo con medios do parque móbil provincial para reforzar os traballos de mellora da rede viaria municipal.
“Grazas a este acordo impulsado desde a Alcaldía foi posible actuar xa en máis de 35 quilómetros de pistas municipais de diferentes parroquias do rural vilalbés durante os últimos anos”, explicou Marta Rouco.
A alcaldesa destacou tamén que “o obxectivo é continuar avanzando na rexeneración progresiva das vías municipais e actuar no maior número posible de pistas, priorizando aquelas que presentan unha maior necesidade de intervención”.
Nas vindeiras semanas os dous equipos continuarán desprazándose por distintas parroquias do municipio para seguir desenvolvendo actuacións de mellora e mantemento da rede viaria rural.
