O delgado territorial da Xunta de Galicia, José Manuel Balseiro, afirma que o número de graos impartidos no Campus Terra “non vai diminuír”, pechando a porta a “calquera recorte na oferta educativa” en Lugo. As declaracións do emisario autonómico prodúcense despois de trascender que a Consellería de Educación estuda a redución de duplicidades nas titulacións do Sistema Universitario Galego.
O mutismo da administración galega levou á inquedanza en Lugo, pois a “readaptación” confirmada por Educación poría en risco ata catro graos vitais para o Campus Terra: a eventual desaparición das enxeñarías Química e Forestal, e o traslado das de Forestal e Agrónoma a Ourense e Pontevedra. O secretario xeral do socialismo lucense, Álvaro Santos, cualificou o plan de ataque do Partido Popular “á médula espiñal” da “filosofía educativa e a excelencia recoñecida” que rixe o modelo universitario lucense.
“Houbo que renunciar a titulacións e a outras iniciativas da Universidade de Santiago de Compostela para poder especializar este Campus na terra”, comentou Santos, para engadir que “dende o Partido Socialista non podemos consentir que se produza, o Campus é fundamental para o desenvolvemento da cidade e da provincia “. O dirixente avanzou medidas no Parlamento, na Deputación e no Concello para previr a diminución da oferta educativa. “Non imos ser cómplices da navallada”.
Balseiro critica a “espiral de mentira”
O delegado territorial advertiu contra a sensación de “alarma e incerteza” que ao seu xuízo procura o Partido Socialista. Balseiro rexeitou calquera recorte nun dos espazos “de maior prestixio do sistema universitario” e acusou aos socialistas de estar instalados “nunha espiral de mentira”.
Así, “o que está en marcha” e que se está negociar sen contar polo de agora co persoal do campus lucense, sería un “proceso de readaptación de titulacións”. A reorganización procuraría o axuste “ás novas demandas da sociedade”, “tal como se acordou en marzo de 2017 entre a Consellería e as universidades do Sistema Universitario de Galicia”. Insistiu Balseiro en que o único obxectivo é “reforzar o Campus Terra e atraer alumnado mediante oferta de titulacións singulares e con perfil profesional de futuro”.
Balseiro garantiu que calquera decisión que se tome, en ningún caso será para este curso, e que, en todo caso, “será adoptada de xeito consensuado coa Universidade”.
