O Tribunal de Instancia, sección Penal, praza 2, de Lugo condenou a un condutor, autor dun atropelo que tivo lugar no mes de agosto de 2021 na intersección das rúas Rafael de Veiga e Nicomedes Pastor Díaz, e que deixou a unha persoa ferida grave.
O acusado, que se declarou autor dos feitos, foi condenado ao pago dunha multa de mil euros e a retirada do carné de conducir por un ano e medio.
Inicialmente, a Fiscalía pedía 2.800 euros de multa e dous anos de retirada do carné, pero antes de iniciarse o xuízo chegouse a un acordo.
Os feitos remóntanse ao mes de agosto de 2021, cando o home, conducindo un vehículo de alta gama, sobre o mediodía atropelou no paso de peóns á vítima, que estaba a cruzar nese momento. Admítese, segundo o informe policial, que non existían restricións de visibilidade, que o paso de peóns estaba ben sinalizado e que había unha restrición de velocidade a 30 km/h, e atribúese o accidente a unha “falta de atención”.
A persoa atropelada sufriu numerosas lesións; por algunhas delas tivo que ser intervida cirurxicamente en dúas ocasións e non recibiu a alta médica ata o mes de decembro dese mesmo ano, aínda que precisou fisioterapia durante dous meses máis e quedáronlle varias secuelas.
No seu momomento, a indemnización fixouse en 15.000 euros polos días de prexuízo causado, as operacións e as secuelas.
