Os representantes do PP pola provincia de Lugo trasladarán ás Cortes Xerais —tanto ao Congreso como ao Senado— o malestar de empresarios, colectivos e alcaldes ante o futuro da autovía A-56. Os populares denunciaron que o Goberno de Pedro Sánchez pretende renunciar a que esta vía sexa unha autovía para todos os efectos, cualificando de “escusa para atrasar a obra” calquera intento de realizar novos estudos que supoñan volver empezar de cero. “O que o Goberno pretende é desandar o andado”, criticaron nunha nota de prensa.
Deste xeito, o Grupo Popular esixirá no Congreso explicacións sobre este “cambio de formulación” e pedirá aclarar se o Executivo descarta definitivamente a execución da autovía. Pola súa banda, os senadores lucenses reclamarán o impulso inmediato dos tramos pendentes entre as cidades de Lugo e Ourense, xa que actualmente na provincia de Lugo só está en funcionamento un único tramo. Entre as súas demandas inclúese a presentación, no prazo de un mes, dun cronograma definido con compromisos temporais e orzamentarios reais.
Xunto á problemática da A-56, o PP tamén levará ás Cortes a necesidade urxente de completar a rehabilitación do firme da N-540, unha actuación anunciada en 2024 que consideran vital ante o estado de abandono da vía. Os populares advertiron de que a provincia de Lugo padece unha “falta de compromiso constante” en materia de infraestruturas viarias, con proxectos estratéxicos que permanecen, segundo denuncian, totalmente paralizados polo Goberno central.
