O secretario xeral dos socialistas lucenses, Álvaro Santos, felicitou á cidadanía lucense pola consecución do servizo de hermodinámica 24 horas no HULA, e avisou de que “isto non pode quedar aquí”. A formación reclamará da Xunta de Galicia a información sobre os lucenses que morreron debido a problemas cardíacos no tempo que se demorou a ampliación do horario dende a inauguración do hospital de Lugo en 2011.
Santos afirmou que “morreu xente por non ter hemodinámica 24 horas”, un feito que debería de “pesar sobre a conciencia” dos líderes do Partido Popular. O líder do Partido Socialista na provincia criticou “unha posición política arbitraria” que, na súa opinión, “condenou aos lucenses a non ter a mesma asistencia sanitaria” ca o resto de galegos.
“Non imos permitir o silencio sobre as dramáticas consecuencias humanas por retrasar esta decisión política durante dez anos”, dixo. Tamén acusou o presidente Alberto Núñez Feijóo de mentir cando afirmou, durante a inauguración do HULA, que os pacientes con eivas de corazón poderían ser atendidos na cidade de Lugo.
“Lugo gana ao PP”
Para Santos, a demora no servizo 24 horas de hemodinámica é consecuencia da redución de prestacións no hospital público de Lugo. O socialista reivindicou o papel do goberno bipartito, que modificou o proxecto inicial do HULA para introducir a hemodinámica en horario continuado, radioterapia ou medicina nuclear. A chegada dos conservadores á Xunta de Galicia conlevou “o recorte destes servizos e atrasar a apertura do hospital dous anos”.
Unicamente a implicación veciñal fixo posible que o Partido Popular “se vise na obriga de dar pequenos pasos, coincidindo coa proximidade de eleccións”. Lembrou o secretario xeral as “manifestacións máis multitudinarias da provincia”, así como a Iniciativa Lexislativa Popular “co maior respaldo na historia” no Parlamento de Galicia, con máis de catro mil sinaturas. Citou o caso do anuncio de apertura de hemodinámica ata as 15.00 horas e do servizo de radioterapia, nas portas das municipais de 2015.
