Tres persoas resultaron afectadas na tarde do martes por unha acumulación de gas na súa vivenda de Édramo, na parroquia de Xermar, no concello de Cospeito. O incidente obrigou á súa evacuación ao Hospital Universitario Lucus Augusti.
Segundo informaron os equipos de emerxencia desprazados ao momento, todo apunta a que a orixe do escape estaría nunha cociña de leña. O 112 Galicia recibiu o aviso ao redor das 18,30 horas a través de Urxencias Sanitarias de Galicia-061, que alertaba dunha posible intoxicación por gas no interior da vivenda. De inmediato, activouse un operativo no que participaron os Bombeiros de Vilalba, a Garda Civil e o persoal sanitario.
Á súa chegada, os equipos de intervención procederon a ventilar e asegurar o domicilio para reducir a concentración de gas e evitar novos riscos. En canto ás persoas afectadas, trátese dun home e de dúas mulleres. A unha delas tiveron que practicarlle manobras de reanimación no lugar aínda que, no momento do traslado ao hospital, atopábase estable.
