A Xunta replica ao alcalde de Lugo, Miguel Fernández, que “deixe a confrontación” e “asuma a xestión” do aparcadoiro da avenida de Breogán para a posta a disposición da cidadanía. O alcalde de Lugo, Miguel Fernández, alertou este mércores de carencias no aparcadoiro da avenida de Breogán, infraestrutura realizada pola Xunta, que visitou estes días para comprobar o seu estado antes de recepcionarla para que se poña disposición dos veciños. Reclama, por tanto, ao organismo autonómico a reparación das “múltiples deficiencias” detectadas na obra.
Lembrou o alcalde que xa durante o último ano, os informes técnicos municipais advertiran sobre o mal estado do aparcadoiro, especialmente no relativo ás zonas verdes e ao mantemento xeral, “que non cumpren os estándares esixidos”.
Respecto diso, nun comunicado, a Consellería de Presidencia critica que, “un día despois de que o Concello contactase coa Dirección Xeral de Mobilidade, mostrando a ‘boa vontade’ para a recepción do aparcadoiro, o alcalde, Miguel Fernández accedese hoxe ao recinto, que actualmente aínda é de titularidade do Goberno galego e está pechado e valado, para facerse unha foto reivindicativa sobre o estado das zonas verdes e a zona de drenaxe, que o Goberno galego xa liquidou“.
A Xunta indica que destinou un investimento de case 1,2 millóns de euros na construción do aparcadoiro disuasorio da avenida de Breogán, financiado pola UE ao amparo dos fondos do Plan de Recuperación. Permitirá dotar ao barrio da Residencia de 148 novas prazas para estacionar, 14 delas para persoas con mobilidade reducida.
