A Federación de Asociacións de Persoas Xordas de Galicia (Faxpg) organiza este sábado, en Lugo, unha celebración do Día Internacional das Persoas Xordas que sairá en marcha da Praza Anxo Fernández Gómez ás 12.15 e, ás 12.30, lerase un manifesto. Tal e como trasladou a federación nun comunicado este venres, “con motivo do loito oficial declarado no Concello de Lugo, suspéndense as intervencións institucionais previstas”. É dicir, a marcha reivindicativa mantense, “pero sen batucada”.

Prevese que acudan ao acto que se realizará baixo o lema ‘Non hai dereitos humanos sen dereito á lingua de signos’ o presidente da Asociación de Persoas Xordas de Lugo (Asorlu), Daniel Lourés, a presidenta de Faxpg, María Alonso Mesia, e o director territorial de Política Social da Xunta, Óscar Viñas.