Caixabank trasladou aos sindicatos un expediente de regulación de emprego (ERE) para 2.157 empregados, 65 deles en Galicia, onde a provincia de Lugo é a menos afectada. O plan da dirección significará o despedimento de sete empregados e a clausura dunha oficina.

Segundo informa GaliciaConfidencial, o ERE de Caixabank tradúcese no peche do 18 por cento das oficinas galegas, algo que os sindicatos consideran “pouco entendible”. O secretario xeral de Comisións Obreiras en Caixabank Galicia, Xoán Carlos Viveiro, salienta que existen “moitas contradicións” porque “aínda hai xente en período de probas, e estas saídas non se xustifican”.

Os sindicatos recibiron a primeira comunicación da dirección de Caixabank o 10 de xaneiro, producíndose a primeira reunión dentro das conversacións este mesmo xoves. Os representantes sindicais e da entidade reuniranse o 24 e o 31 de xaneiro no marco das negociacións previas.