A Deputación de Lugo lanzou unha aplicación de móbil gratuíta co obxectivo de facilitar o contacto entre as persoas que buscan traballo e empresas. A ferramenta está xa dispoñible e, segundo explicou a institución provincial, supón “un avance na modernización” dos servizos públicos de intermediación laboral que a Deputación ofrece mediante a súa Axencia de Colocación.
A aplicación ‘Deputación Lugo Emprego‘ permite aos demandantes de emprego xestionar os seus perfís profesionais de forma áxil e acceder de maneira inmediata ás ofertas de traballo publicadas pola Axencia de Colocación. Ao mesmo tempo, esta ferramenta axuda ás empresas a axilizar a publicación das súas ofertas e mellorar os procesos de selección, adaptándoos mellor ás súas necesidades para atopar o persoal máis adecuado.
