A Sala do Social do Tribunal Superior de Xustiza de Galicia (TSXG) rexeitou que a multinacional do sector téxtil H&M modificase de forma substancial as condicións de traballo ao substituír a tradicional cea de Nadal da empresa por un almorzo na súa tenda de Lugo.
Nunha sentenza con data do pasado martes e da que informou este xoves o TSXG, a Sala do Social estimou o recurso presentado pola empresa e revogou unha sentenza ditada polo Xulgado do Social número 4 de Lugo. Ademais, desestima a demanda presentada por unha empregada da multinacional, á que absolveu de todos os pedimentos. O TSXG explica que, aínda que concorre unha modificación, entende que non é substancial porque, sinala que se trata de “algo meramente secundario e insignificante (cuantifícase en 30 ou 40 euros ao ano)”.
Tamén apunta que, “en puridade, esa condición non se suprimiu, senón simplemente alterou, dado que o único cambio real é trasladar ese evento da noite para a mañá e celebralo no propio centro de traballo, pero nada máis“.
Os maxistrados do alto tribunal galego argumentan que “unicamente se transformou o evento”, pois destacan que “conserva os seus trazos fundamentais identificables: reunión dos empregados, tempo no que se realiza (Nadal), valor que se pode atribuír…”. A iso, os maxistrados do TSXG engaden que, “en si mesma, esa actividade ten os mesmos trazos anteriores, aínda que nun ambiente quizais máis encorsetado (no centro e horario de traballo)”, polo que non consideran que se deba cualificar como unha modificación substancial.
Ademais, recalca que “a decisión que modifica aquela forma de gozar a cea de Nadal de ningún xeito altera ou transforma aspectos fundamentais da relación laboral, senón un moi secundario”. O fallo non é firme, pois cabe presentar recurso de casación ante o Tribunal Supremo.
