O Colexio de Médicos de Lugo animou ao persoal agredido a denunciar tras un incidente en Guntín, “onde un equipo do Punto de Atención Continuada foi ameazado gravemente cunha arma cando acudía a prestar asistencia a unha paciente e tamén no Hospital Universitario Lucus Augusti, onde continuaron as coaccións por parte dun familiar de dita paciente”.

Ademais de trasladar o seu apoio aos profesionais que se enfrontan a estas situacións, condena “calquera forma de agresión contra calquera integrante do colectivo médico, ben sexa verbal, física ou psicolóxica”.

“A violencia non debe ter cabida na relación médico-paciente e constitúe un grave atentado contra a seguridade de quen dedican a súa vida ao coidado da saúde dos demais”, engade.

Tamén anima a calquera profesional colexiado a denunciar este tipo de condutas ante as autoridades competentes e a comunicalo ante este Colexio “co obxectivo de erradicar a violencia no ámbito sanitario”.

“Lograr unha ‘taxa 0’ de violencia no exercicio da profesión é unha responsabilidade compartida por toda a sociedade, que indubidablemente comeza con non normalizar, en ningún caso, esta clase de situacións”, sinala nun comunicado no que pon a disposición dos afectados os seus recursos en cuestións como o asesoramento xurídico.