A portavoz popular no Concello de Lugo, Elena Candia, negou que os orzamentos municipais para este ano sexan “ilusionantes, sensatos e realistas”, en referencia ás palabras coas que os definiu á alcaldesa. Por contra, afirmou que o descenso do investimento, a falta de máis partidas para o rural, os incumprimentos financeiros ou as desigualdades cos colectivos “negan estes cualificativos”.
Asegurou a concelleira popular que os orzamentos reflicten “unha xestión marcada pola improvisación, a falta de ambición e o afastamento das prioridades reais dos lucenses”. Elena Candia, que na valoración dos orzamentos estivo acompañada polos concelleiros populares da Corporación, explicou que “son unhas contas que chegan tarde e que foron pouco respectuosas co Grupo Popular, xa que os presentaron antes de facernos chegar os documentos oficiais”. Manifestou que “aínda así, seguiremos traballando de forma construtiva e presentaremos achegas para melloralos”.
Unha das primeiras críticas do grupo popular é un descenso no capítulo de investimentos, sendo “os máis baixos do últimos sete anos, marcando un retroceso en lugar dun avance”. E insiste en que son pouco realistas “xa que os informes alertan de previsións excesivamente optimistas, especialmente no ámbito da inspección tributaria, onde xa se demostraron resultados decepcionantes en 2024”, declarou.
