Un home foi denunciado pola Policía Local de Lugo por insultar aos axentes que procedían ao peche dun ‘after hours’ da capital luguesa na mañá do pasado martes. Segundo comunicou este xoves a Policía Local de Lugo, o individuo foi identificado e proposto para sanción por unha infracción á Lei de Seguridade cidadá despois de dirixir cara aos axentes improperios como “sodes unhas merdas” ou “pechade outros locais e non este, que se están gañando a vida”. O incidente ocorreu ás 11.50 horas da mañá do martes cando un indicativo da unidade da Policía de barrio se desprazou a un local hostaleiro que funciona como ‘after hours’ situado na rúa García Abad para proceder á súa clausura.
DETIDO POR TRÁFICO DE DROGAS
Ademais, a Policía Local de Lugo tamén detivo a un home que foi sorprendido cando circulaba no seu coche con 200 gramos de haxix. Unha patrulla que realizaba tarefas preventivas deu o alto a un vehículo ás 00.50 horas do mércores na rúa Lamas de Prado tras observar danos no coche.
Ao aproximarse, decatáronse do forte cheiro a haxix que procedía do interior do automóbil, que foi rexistrado ata localizar unha peza envolta en plástico de 200 gramos de resina de cannabis. Ademais de ser denunciado por un delito contra a saúde pública, o condutor foi sometido á proba de drogas, na que deu positivo en THC.
