O Concello de Lugo vén de lograr fondos europeos para o desenvolvemento do proxecto europeo ‘Socilibre’, para promover a inserción laboral de colectivos en risco de exclusión social, á vez que se potencia a competitividade dos comercios locais de Lugo e da cidade portuguesa de Braga, que é a que lidera esta iniciativa social e empresarial.
O programa ten como meta a creación e posta en marcha dunha rede loxística de repartición en bicicletas de produtos quilómetro cero de última milla, á vez que se mellora a formación de competencias dixitais dos negocios polo miúdo e promóvense novas iniciativas nas zonas de baixas emisións.
O edil de Dinamización Económica do Concello de Lugo, Mauricio Repetto, sinala que con este proxecto apostan “pola mobilidade sustentable e polo estudo de novos nichos de mercado, á vez que se favorece a formación e a inserción laboral de persoas que se atopan en risco de excusión social”.
O proxecto europeo está dotado con 436.000 euros, dos que o 75 %, uns 326.900 euros, están achegados por Fondos Europeos de Desenvolvemento Rexional (FEDER). Os outros preto de 109.000 euros serán achegados polos sete beneficiarios do proxecto, que se desenvolverá ata o 31 de decembro de 2025, no marco do programa Interreg V-A España-Portugal 2021-2027.
De entre as institucións e administracións que integran o partenariado, a de Lugo é a que recibe un maior orzamento, con 148.612 euros, dos que 111.459 están achegados por fondos FDEDER e os 37.153 euros restantes serán cofinanciados polo goberno local nas anualidades de 2024 e 2025. Ademais dese sete socios de proxecto, dentro do partenariado figuran como beneficiarios sen achega económica o Clúster de Automoción e Mobilidade de Galicia (CEAGA); a Asociación Eixo Atlántico do Noroeste Peninsular; e a Asociación Portuguesa de Loxística, APLOG.
