Un peregrino de 70 anos faleceu na mañá deste mércores ao sufrir unha indisposición cando percorría o Camiño Primitivo, ao seu paso pola localidade lucense de Castroverte.

Segundo informou o CIAE 112 Galicia, o suceso tivo lugar ás 9,45 horas, cando outro camiñante solicitou asistencia sanitaria para un dos compañeiros do seu grupo, que se esborrallou á altura da parroquia A Frairía, en Castroverde. Na súa chamada, o alertador sinalou que o home permanecía inconsciente.

Desde o 112 Galicia solicitouse a colaboración de Urxencias Sanitarias de Galicia-061, que mobilizou unha ambulancia e o helicóptero medicalizado con base en Ourense, e os axentes da Garda Civil. A pesar dos esforzos, os profesionais sanitarios só puideron confirmar o falecemento do home.

Trátase do segundo peregrino que falece por indisposición en menos de 24 horas, tras perder a vida o martes un home de 58 anos en Portomarín.