Entre primeira hora deste mércores e a noite do xoves, a Montaña lucense quedará en alerta amarela. Os fenómenos que motivan o aviso son refachos de vento que acadarán os 80 quilómetros por hora de xeito puntual, e que perderán intensidade na madrugada do xoves; e a acumulación de neve, de ata 5 centímetros cada 24 horas, que persistirá ata a madrugada do venres.
A caracterización de alerta amarela implica que non existe risco meteorolóxico para a poboación en xeral, e só para algunha actividade concreta, porque estes fenómenos meteorolóxicos son habituais pero potencialmente perigosos.
A alerta amarela afecta a catorce concellos da Montaña: Baleira, Baralla, Becerreá, Cervantes, Folgoso Do Courel, A Fonsagrada, O Incio, Navia de Suarna, Negueira de Muñiz, As Nogais, Pedrafita do Cebreiro, Ribeira de Piquín, Samos e Triacastela.
