A Garda Civil investiga a dous veciños de Lugo de 34 e 44 anos de idade que foron gravados por un policía local fóra de servizo cando conducían de forma temeraria pola N-6. Segundo informou o Instituto armado, os feitos tiveron lugar o pasado mes de novembro na estrada N-6, á altura do quilómetro 500.
No vídeo achegado polo axente pódese observar como dous turismos efectuaban manobras de adiantamento en zona prohibida, pola dereita, e circulaban en zig-zag para cortar a circulación ao outro vehículo. Todo iso mentres numerosos vehículos circulaban polo outro carril.
Tras ter coñecemento dos feitos, realizáronse xestións para a identificación dos vehículos e dos seus condutores, que derivaron na investigación de ambos os condutores como supostos autores dun delito contra a seguridade viaria por condución temeraria. As dilixencias foron entregadas no Xulgado de Instrución de Garda de Lugo.
