Un home faleceu este xoves tras chocar o coche que conducía contra outro vehículo no municipio lucense de Antas de Ulla.
Segundo informou o 112, no momento de producirse o accidente, os vehículos circulaban pola N-640 ao seu paso pola parroquia de Dorra.
Así o indicaba un dos particulares implicados no sinistro que chamou dez minutos antes das 23 horas ao 112 Galicia para pedir axuda. Segundo o seu relato, perdeu o control do seu vehículo e chocou contra un turismo, no cal viaxaba unha persoa que precisaba asistencia sanitaria urxente, xa que parecía estar inconsciente.
Con estes datos, os xestores do 112 Galicia puxeron enseguida en alerta ao persoal do Servizo de Urxencias Sanitarias de Galicia-061, aos membros do GES de Monterroso e aos axentes da Garda Civil.
A pesar dos esforzos, nada se puido facer por salvarlle a vida ao condutor dun dos vehículos implicados no accidente. A maiores, outra persoa foi atendida no punto polo persoal sanitario debido a feridas leves, aínda que non foi necesario o seu traslado.
