O deputado popular Francisco Conde avanzou este venres que o seu grupo “esixirá no Congreso, a través dunha proposición non de lei, que o Goberno do Estado garanta a viabilidade do proxecto de Altri, a súa inclusión no PERTE de descarbonización e o acceso a fondos europeos”.
En concreto, Conde confía en que Sánchez “aproveite a visita” prevista este sábado a Lugo para “concretar o apoio que necesita Altri” para que a fábrica de fibras téxtiles aséntese na provincia, concretamente en Palas de Rei.
“Sería imperdoable que non dixese nada, tendo en conta que está en xogo a reindustrialización da nosa provincia”, dixo Francisco Conde, que confía en que non “deixe pasar unha oportunidade significativa para o desenvolvemento económico e a innovación industrial en Galicia que contribuiría á creación de 2.500 empregos”.
Conde dixo que “Sánchez garantiu publicamente hai ano e medio ao presidente Rueda os fondos que permitirían o desenvolvemento deste proxecto”, que suporía un investimento de 900 millóns de euros. Con todo, afeou, “estamos en xaneiro de 2024 e nin o Goberno, nin o Partido Socialista, nin tan sequera o home anuncio que Pedro Sánchez ten en Galicia foron capaces de trasladar aos galegos unha soa certeza que garanta que van cumprir a palabra dada”.
Os populares reivindican que “Lugo e Galicia non son menos que outras provincias e Comunidades”, polo que “non se entendería que Sánchez non diga nada sobre este proxecto”.
Paralelamente, os populares tamén piden acelerar o lanzamento das liñas do PERTE e as bases das convocatorias; así como colaborar con Altri, os posibles socios potenciais e entidades implicadas no proxecto para fortalecer a cadea de valor e garantir un impacto económico e sobre o emprego local positivo.
Ademais, reclaman transparencia e participación pública en todas as etapas do proxecto e solicitan que o Ministerio de Transición Ecolóxica e Reto Demográfico inclúa de forma inmediata unha modificación na Planificación Eléctrica 2021-2026 a efectos de que se poida construír a subestación eléctrica necesaria para garantir o abastecemento enerxético da planta.
