O sector da limpeza de Lugo criticou a “absoluta falta de vontade negociadora” de Aspel e o seu “desinterese” por chegar a un acordo de convenio que permita finalizar co conflito, polo que anunciou máis accións reivindicativas. Nunha nota de prensa, a CIG asegurou que 36 días despois de iniciar a folga e despois de que a asemblea do persoal rexeitase por insuficiente a última oferta, a patronal presentouse este luns na reunión “sen unha nova proposta e esperando que fose a parte social quen lles trasladase outra plataforma”.
Para a CIG, esta actitude manifesta o “desprezo da patronal” cara aos traballadores e evidencia a pretensión de Aspel de “desactivar o conflito dilatando no tempo as negociacións”. “Unha manobra” que, segundo subliñou, os traballadores xa advertiron que “non vai funcionar” porque as súas reivindicacións son “xustas e totalmente asumibles para unhas empresas que gañan beneficios millonarios”. “Só reclamamos unhas táboas salariais que quedarían un pouco por encima do SMI, porque para negociar o salario mínimo non hai que sentar nunha mesa, xa o dá a lexislación”, destacou Asunción Castiñeira.
CARAVANA REIVINDICATIVA
Neste contexto, para dar visibilidade á súa loita, as traballadoras instalarán desde este martes, ás 12.00 horas, unha caravana reivindicativa na chaira do edificio multiusos da Xunta. Así mesmo, a CIG celebrará o mércores 22 en Lugo, o ‘Encontro nacional de mulleres’ no marco da campaña polo Día internacional para a eliminación da violencia contra as mulleres. Ao finalizar o encontro, ás 12.00 horas, as delegadas da CIG e as traballadoras en folga sairán en manifestación desde o edificio da Deputación ata a sede da Confederación de Empresarios de Lugo.
