A área socialista do Goberno local de Lugo defenderá no pleno ordinario deste mes unha proposición na que solicita á Xunta revisar o Decreto 222/2011, polo que se establece o alumnado mínimo por grao universitario como criterio para asegurar a súa viabilidade, “por non adecuarse á realidade galega e polas múltiples implicacións que a, a nivel social, económico e científico, ten esta norma para Lugo e, por extensión, para toda a Galicia rural”.
Co obxectivo de garantir o futuro do Campus Terra conservando a súa actual oferta educativa na capital lucense, o texto, segundo trasladou o Concello, insta tamén á USC a considerar a especialización do Campus Terra “como un valor competitivo diferencial na súa toma de decisións, especialmente ante unha posible reconfiguración do seu mapa de titulacións”.
“Os criterios para definir a viabilidade dunha titulación non poden establecerse unicamente polo número de alumnos e alumnas matriculados, senón polo rendemento que as persoas con titulación nestes graos achegan ao territorio”, manifestou a alcaldesa, Lara Méndez.
Neste sentido, insistiu en que a vinculación do Campus con Lugo ten “un peso capital no sistema produtivo”, ademais de lembrar algunhas das achegas dos equipos de investigación á sociedade.
“Gran parte da reforma estrutural acometida nas explotacións gandeiras galegas no século XXI levou a cabo tendo en conta os criterios de optimización de produción dos expertos de esteCampus. Ademais, o traballo de I+D+i que leva a cabo desde este espazo permitiu que valiosos proxectos empresariais visen a luz nos últimos anos, posibilitando fortalecer a nosa economía e dinamizando o mercado laboral”, defendeu a alcaldesa.
