O portavoz do BNG no Congreso dos Deputados, Néstor Rego, pediu ao Ministerio de Transportes que axilice os traballos de limpeza de cascallos no lugar do derrube de terra rexistrado en Becerreá e garanta a operatividade da A-6 canto antes.
Nun comunicado remitido aos medios, o parlamentario nacionalista critica o atraso no inicio dos labores de limpeza dunha autovía “fundamental” para a conexión de Galicia coa Meseta. “Os traballos empezaron case unha semana despois do corremento de terras que invadiu os dous carrís en dirección A Coruña e non temos data de cando vai estar operativa a vía”, reprocha o deputado do BNG ao ministerio.
Neste sentido, preguntou a que se debe esta demora nas actuacións nunha “vía básica” para as comunicacións do transporte de mercadorías e que permanece pechada á altura do derrube o que, segundo indicou, “está a causar importantes problemas de circulación”.
