O Concello levará a pleno a modificación do ordenamiento urbanístico de Lugo para converter O Garañón en zona verde, o que implicaría o derrubamento das torres. De saír adiante a proposta, o espazo quedaría inhabilitado para novas construcións despois da demolición do complexo ilegal.
A edificación actual ten as licenzas anuladas, e o goberno local debe cumprir un mandado xudicial e modificar puntualmente o Plan Xeral de Ordenación Municipal (PXOM) no sector do Garañón. Son tres as sentenzas do alto tribunal galego ao respecto deste solar.
A iniciativa foi trasladada ao resto de grupos da corporación municipal durante a comisión de seguimento do Garañón. O executivo de Lara Méndez descoñece polo de agora as consecuencias económicas que tería a modificación do PXOM, e que debería asumir o consistorio.
Así as cousas, o Concello contactará co propietario do solar para negociar e compensar os dereitos de edificación a través da cesión doutras parcelas de propiedade municipal, un procedemento de negociación regrado empregado con anterioridade para os terreos do novo colexio Sagrado Corazón, a Estación Intermodal ou o tapón da Avenida da Coruña, entre outros.
A rexedora afirmou que, antes de tomar este curso de acción, o equipo de goberno pedira en marzo un informe á Dirección Xeral de Patrimonio para “traballar conxuntamente”. Ante a negativa do departamento da Xunta de Galicia, a alcaldía decidiu seguir adiante e propor que o Garañón pase a ser zona verde.
