O Concello de Lugo porá en marcha este próximo curso escolar un servizo de asesoría en liña a través do que se prestará asistencia e apoio en materia de igualdade e violencia de xénero ao alumnado dos catro cursos de ESO e FP, así como á comunidade estudantil de 5º e 6º de Educación primaria.

Tal e como detallou o consistorio municipal, a iniciativa enmárcase dentro do Programa socioeducativo de prevención das violencias machistas ao que poden adscribirse todos os centros escolares do municipio.

“O obxectivo desta innovadora medida é detectar diferentes manifestacións da violencia de xénero, especialmente as máis invisibles e sutís, ofrecendo un punto de asesoramento inmediato e información en liña a través da aplicación Whatsaap, aproveitando así a enorme instauración desta canle entre a mocidade”, sinalou a responsable da área de Conhesión Social, Ana González Abelleira.

O Programa de prevención de violencia de xénero nos centros educativos realízase, co actual formato, desde o ano 2016. No pasado curso participaron seis do nove institutos da cidade e 11 colexios dun total de 14.

“Cremos firmemente que a coeducación é o mellor instrumento para a promoción dun proceso de transformación social que sente as bases dunha sociedade onde a igualdade sexa real e efectiva. Desde esta base, o programa está deseñado cunha tripla perspectiva: transversal, multidisciplinar e integradora”, explicou.

Ademais, a comunidade escolar contará tamén cunha asesoría presencial co mesmo obxectivo e que “diversifica as opcións que a mocidade ten para acceder á información ou solicitar axuda”.

De forma complementaria, o Concello sinalou que se organizarán xornadas de sensibilización dirixidas ao profesorado e ás familias do alumnado daqueles centros que así o soliciten.

Así mesmo, durante os recreos ou tutorías, dependendo das necesidades de cada centro, o Concello instalará Puntos Violetas Itinerantes para detectar manifestacións sexistas.