O goberno de Lugo informou de que se procederá a contratar a mellora da iluminación do Parque de Rosalía “con criterios de aforro enerxético e perspectiva de xénero“. A obra, que suporá un investimento de 162.073 euros, será adxudicada a empresa Hallmann Energie S.L. na xunta de goberno que se celebra este mércores na Casa Consistorial.
Así o anunciou a alcaldesa, Lara Méndez, quen enmarcou esta actuación dentro do programa Edusi-Muramiñae, cofinanciado ao 80 % con Fondos Europeos de Desenvolvemento Rexional. “Co fin de avanzar na conservación e coidado deste enclave único da cidade, levaremos a cabo a renovación e adecuación da instalación existente. Os traballos inclúen a actualización de luminarias, canalizacións, centros de mando e demais compoñentes“, explicou.
Con este paso, aspírase a incrementar a eficiencia enerxética da iluminación pública nos espazos que dan servizo á pista de patinaxe, á caseta de xardinaría, ao mapa, e o estanque, entre outras localizacións. “Entre os obxectivos desta intervención está pór en valor emprazamentos singulares do parque, considerado unha contorna de protección patrimonial, de forma que conviden ao uso cidadán do espazo público e revertan directamente nunha maior seguridade desde a perspectiva de xénero, xa que se colocarán tamén novos puntos de reforzo para evitar zonas consideradas escuras“, dixo Méndez.
“As localizacións actuais, iso si, respectaranse de forma que, tras a limpeza das columnas e brazos existentes, cun alto valor decorativo e que pretendemos conservar, levarase a cabo a súa restauración correspondente, substituíndo a tecnoloxía de iluminación antiga por outra máis moderna e eficiente”, remarcou. Finalmente, apuntou que, co fin de evitar actos vandálicos nos centros de mando, estarán protexidos fronte á manipulación de persoas alleas.
