O presidente da Deputación de Lugo, José Tomé Roca, asinou este venres no Pazo de San Marcos un convenio de colaboración cos 52 alcaldes e alcaldesas da provincia que decidiron sumarse ao Impulsa TIC.
Trátase dun novo proxecto da institución provincial a través do que proporcionará gratis ferramentas tecnolóxicas ás entidades locais para avanzar na súa modernización e transformacióndigital.
En presenza dos responsables municipais que decidiron sumarse ao Impulsa TIC e do deputado de Promoción Económica e Social, Pablo Rivera Capón, o presidente explicou que Lugo se sitúa á cabeza das institucións provinciais de toda España que recibiron máis fondos desta liña de axudas convocada polo Ministerio de Política Territorial, xunto ás de Barcelona, Valencia e Sevilla.
“O que dá boa conta do nivel e da calidade da candidatura que presentamos”, destacou o mandatario provincial. Tamén sinalou que este programa estivo aberto a todos os municipios da provincia de menos de 20.000 habitantes e puxo en valor que participasen, case o 80% dos concellos que podían facelo.
Por outra banda, a Xunta de Goberno da Deputación de Lugo aprobou este venres un investimento que supera os 100.000 euros para mellorar infraestruturas e servizos públicos dos veciños e veciñas de Alfoz.
