Os servizos de emerxencia tiveron que excarcerar a unha persoa de avanzada idade que envorcou co seu vehículo na estrada LU-P-2901, na parroquia lucense de Poutomillos.

Segundo trasladou o 112 Galicia, o condutor, e único implicado, sufriu unha saída de vía no quilómetro sete desta estrada e acabou envorcado na cuneta.

O suceso produciuse sobre as 10.30 horas. Nese momento, unha testemuña do sinistro chamaba á central de emerxencias para informar dos feitos.

Con esta información, o 112 deu aviso ao Servizo de Urxencias Sanitarias de Galicia-061, aos Bombeiros de Lugo, á Garda Civil de Tráfico e á Policía Local.

Debido á situación na que quedara o coche sinistrado, os servizos de emerxencia comprobaron que o ferido, de avanzada idade, era incapaz de abandonalo polos seus propios medios, polo que procederon a excarceralo.

A continuación, foi atendido polo persoal sanitario, que se desprazou ao lugar a bordo dunha ambulancia.