Un menor de 15 anos agrediu presuntamente, na tarde do pasado luns, á súa nai na Avenida de Madrid, en Lugo. Segundo informou o Concello, axentes da Policía Local trasladáronse ata o lugar onde falaron coa nai que manifestou ser agredida polo seu fillo.
Por iso, presentouse unha ambulancia do 061 que realizou unha exploración ao menor, sen que atopasen lesións visibles nin alteracións que necesitasen medicación, a nai pola súa banda rexeitou “calquera tipo de recoñecemento médico“. Os axentes levantaron o correspondente parte de intervención policial para a súa remisión ao órgano competente.
OUTROS SUCESOS
Por outra banda, tamén na tarde do luns, os axentes da Policía Local acudiron á Praza Horta do Seminario xa que, ao parecer, había unha persoa que causaba molestias á cidadanía.
Así, os axentes procederon á identificación dun home de 47 anos e comprobaron, mediante as bases de datos policiais, que sobre el había dúas ordes de detención e presentación ditadas polos xulgados da Coruña. Ante isto, os axentes procederon á súa detención e trasladárono a dependencias policiais onde instruíron as dilixencias oportunas.
