Axentes da Policía Local de Lugo detiveron nas últimas horas a un home como presunto autor dun delito de atentado a axentes da autoridade, tras agredir a varios policías.
Os feitos ocorreron sobre as 04,00 horas deste xoves día 18, cando unha patrulla se atopaba intervindo cun condutor ebrio na rúa Mariña Española, segundo informa o Concello de Lugo nun comunicado. Nese momento, engade, un mozo saíu dun local de lecer nocturno e achegouse aos axentes en “actitude desafiante e en ton despectivo profire diversos insultos” ás autoridades.
Os funcionarios procederon á súa identificación, pero o home negouse reiteradamente, sendo trasladado a dependencias policiais para a súa completa identificación, “encarándose cos policías, empuxándoos e braceando, momento no que agrediu no peito a un deles”.
Por estes feitos, procedeuse a súa inmovilización e detención por un presunto delito de atentado a axentes da autoridade, sendo trasladado inicialmente a un centro médico para ser recoñecido e posteriormente ás dependencias policiais para a instrución de dilixencias para o xulgado de garda.
