As presións sociais e políticas levaron á Xunta a rectificar e repoñer a frecuencia eliminada no bus que une Lugo e a Pobra de San Xiao, imprescindible para os escolares de Láncara que estudan na capital da provincia. A supresión do horario das 14.35 horas obrigaba a combinar o servizo escolar co regular, derivando en condicións perigosas para os usuarios, que debían viaxar en pé ou sentados no corredor do autobús.
A situación chegara a tal punto, que o alcalde socialista de Láncara, Darío Piñeiro, ameazara con denunciar as deficiencias perante a Fiscalía. Os nacionalistas da localidade conseguiran que o asunto entrara no Parlamento de Galicia, esixindo a reposición da frecuencia que este luns volve a funcionar. Logo destes feitos, a Xunta tomou a decisión o venres de autorizar novamente o horario das 14.35, aliviando a demanda sobre outro dispoñible entre Lugo e A Pobra, ás 15.30 horas.
“Cuestións técnicas”
Aliás, o Partido Popular di agora que “liderou” a iniciativa, malia que a eliminación da frecuencia de bus era parte do novo Plan de Transporte da Xunta. O voceiro da formación en Láncara xustificou a demora na reposición do servizo por “cuestións técnicas”, pola necesaria adaptación dos “programas e das máquinas expendedoras” dos billetes. O autocar de Monbús que sae de Lugo ás 14.35 horas funcionará todos os días laborais dende este luns 22 de outubro.
O rexedor de Láncara explicara que as condicións eran perigosas para os viaxeiros; sen prazas suficientes, moitos nenos estaban obrigados a viaxar no corredor e no chan do autobús. Para Darío Piñeiro, o goberno galego participaba “dunha ilegalidade”, poñendo en perigo a vida dos alumnos e do resto de pasaxeiros.
Dende o Bloque Nacionalista Galego fan eco da necesidade de que as paradas do autobús se produzan no centro da Pobra de San Xiao, e non no apeadoiro da LU-536, pola perigosidade que carrexa para a veciñanza. “A empresa concesionaria sempre rexeitou esta cuestión asegurando que retrasaría a combinación cos servizos ferroviarios, porén, xa non hai tren ningún”.
