Axentes da Policía Local de Lugo recuperaron un vehículo que figuraba como subtraído, e cuxas placas de matrícula foran manipuladas, segundo informaron fontes policiais.
Na mañá deste mércores, unha patrulla da Unidade Territorial de Policía de Barrio observou un vehículo estacionado na rúa Avutarda, que presentaba as portas dianteiras abertas. Así mesmo, os axentes comprobaron que as placas de matrícula foran manipuladas, modificando unha das letras con cinta illante para que parecese outra letra.
A Policía consultou as bases de datos e constatou que o coche figuraba como roubado, polo que se procedeu á súa retirada e traslado ao depósito municipal. Doutra banda, fontes policiais informaron da tramitación de varias dilixencias de denuncia contra condutores por diversas infraccións.
Así, foron denunciados 9 condutores por non pasar a ITV no prazo debido, outros 4 condutores por circular sen o seguro obrigatorio, e outro tres por conducir sen usar o cinto de seguridade. Así mesmo, foi denunciado o condutor dun patinete eléctrico por levar un pasaxeiro, e outros dous condutores, tamén de patinetes, por circular sen sistemas de iluminación.
