Esquerda Unida e Podemos decidirán a finais deste mes de febreiro se presentarán unha lista conxunta nas eleccións municipais do 28 de maio na cidade de Lugo.
Así o manifestou a candidata de Esquerda Unida, María Jesús Rodríguez, que constatou que “de momento” só pode confirmar que mantiveron reunións. “Estamos a manter conversacións as dúas forzas políticas, pero non hai nada establecido nin asinado”, revelou.
Con todo, Rodríguez expuxo que “hai unha boa sintonía en moitas cousas” e sinalou que co “esforzo das dúas partes” é posible que cheguen a un acordo. “Temos que acabar de falar e ver cales son os puntos para poder materializar algo, para unir a toda a esquerda”, salientou.
Neste sentido, afirmou que se deben dialogar “unhas liñas marcadas e uns contidos ideolóxicos” que porán “enriba da mesa” para “acordar”. A candidata de EU deixou claro que “cara a finais deste mes” terán “unha decisión adoptada”.
Pola súa banda, fontes de Podemos desvelaron que esta semana haberá unha reunión entre ambas as forzas políticas, deixando entrever que desde Esquerda Unida non se quere “pactar nada”. Estas mesmas fontes da formación morada deducen que “non queren ir en coalición e queren ir sós” aos próximos comicios locais.
