A xunta de goberno da Deputación de Lugo deu luz verde este venres ao seu plan anual de contratación para este exercicio económico de 2023, por unha estimación de case 30 millóns de euros.
A portavoz socialista do goberno provincial, Pilar García Porto, explicou en rolda de prensa que “se trata dun documento de obrigada elaboración, segundo establece a Lei de Contratos do Sector Público, que o que fai é unha previsión estimativa dos procedementos de contratación de servizos, de subministración e obras que se van a desenvolver desde a institución provincial”.
A continuación, profundou en que “é un documento de traballo que reflicte a capacidade de planificación, de xestión e transparencia que ten este goberno”. Con todo, puntualizou que a cifra de 30 millóns de euros “é estimativa”.
‘COÑECE A TÚA PROVINCIA’
Ademais, a xunta de goberno aprobou a listaxe de entidades admitidas na terceira edición do programa ‘Coñece a túa provincia’, que se promove desde a área de Turismo con dúas quendas, na primavera e outono.
No devandito programa “de viaxes gratuítas por toda a provincia de Lugo”, que nace en 2021 e xa vai pola súa terceira edición, participaron xa 4.500 persoas, nas dúas anteriores. Xa para este ano son 3.036 as prazas ofertadas nestas viaxes que arrincarán en marzo, na quenda de primavera, e xa en outubro para o outono.
Así mesmo, a reunión semanal do goberno da Deputación acordou destinar 1,6 millóns de euros para a mellora da rede provincial de estradas de Lugo, con actuacións nos concellos de Baleira, O Saviñao, A Fonsagrada, Chantada e Carballedo.
