A Deputación de Lugo activou un operativo de seguridade viaria ante a previsión de xeadas pola baixada de temperaturas. Os traballos, explicou a institución provincial, arrincarán este sábado pola tarde e centraranse sobre todo en esparcir sal no firme daquelas vías que está catalogadas “como de risco en formación de placas de xeo”.
Para estas funcións, a Deputación detallou que dispón de 420 toneladas de sal de mina nos 12 silos que ten distribuídos por toda a provincia. Estes depósitos atópanse en Ourol, O Valadouro,Riotorto, Lugo, Becerreá, O Incio, Pedrafita do Cebreiro, Folgoso do Courel, Cervantes, Navia de Suarna, A Fonsagrada e Ribas de Sil.
Así mesmo, o Plan de Vialidade Invernal da administración provincial pon a disposición dos concellos da provincia sae de mina para que poidan atender aos problemas que se produzan nas estradas municipais debido ás condicións meteorolóxicas adversas.
A Deputación tamén lembrou nunha nota de prensa que todos os municipios que necesiten abastecerse de fundibles por razóns de urxencia deberán dirixir unha solicitude previa ao Coordinador de Emerxencias da Rede Viaria Provincial co obxectivo de dar unha resposta “eficaz e adecuada” a cada unha das peticións, así como “facer un control ordenado dos recursos”.
