A ex-xuíza do número uno de Lugo, Pilar de Lara, prepara o recurso que presentará ante o Tribunal Europeo de Dereitos Humanos, cuxo prazo vence o 4 de febreiro, contra a sanción que lle impuxo no seu día o Consello Xeral do Poder Xudicial (CGPJ) e que lle supuxo a perda da súa praza e destino en Lugo. Agora exerce en Ponferrada.
Tras a inadmisión polo Tribunal Constitucional, o avogado da xuíza, Agustín Azparren, precisou que “o que se trata é de centrar os motivos no que é específico de vulneración do convenio europeo de Dereitos Humanos”.
Trabállase en “concretar o que ata agora se enfocou a nivel nacional, pero sobre todo é moi importante no Tribunal Europeo de Dereitos Humanos, que é menos formal que como pode ser en España, pero é moi importante especificar os motivos, resumilos e deixalos moi claros”.
Nese prego de descargo, apuntarase “o que se considera parte dos argumentos xa utilizados ante o Tribunal Constitucional, que eran xa a vulneración do convenio europeo de Dereitos Humanos e en base a xurisprudencia do Tribunal Europeo de Dereitos Humanos”.
“Co cal, a parte máis importante relativa ao tribunal europeo xa está exposta e estudada“, agrega. “O prazo acaba o catro de febreiro, co cal queda practicamente un mes”, explica.
A xuíza foi castigada, entre outras causas, por dilacións indebidas nos múltiples procesos e macrocausas que levou en Lugo, como a Operación Carioca –sobre redes de prostitución– a Pokémon –sobre mordidas a políticos– ou a Operación Polbo –relativa á Deputación de Lugo e que recentemente se arquivaba no tocante á parte que afectaba á imputación do ex secretario xeral dos socialistas galegos, José Ramón Gómez Besteiro–.
