O Partido Socialista de Galicia (PSdeG-PSOE) demandou este luns á Xunta axilizar a tramitación administrativa para que os gandeiros poidan obter o certificado dixital, así como poder concorrer a subvencións e tramitar expedientes coas diferentes administracións.
Segundo informou o Grupo Socialista nun comunicado, o PSdeG-PSOE reclamará ao Goberno galego, a través dunha moción na Deputación de Lugo, reformas na tramitación do certificado dixital despois de escoitar as queixas dos gandeiros lucenses.
Con esta proposta, os socialistas demandan “dotar do persoal necesario ao rexistro da Delegación de Lugo para garantir que se atendan todas as citas concedidas para obter o certificado dixital, e que se tomen as medidas precisas para descentralizar a realización deste trámite, estudando coa Deputación e os concellos fórmulas que eviten os desprazamentos ou se reduzan considerablemente”.
Ademais, na iniciativa rexistrada, o PSdeG-PSOE insta á Xunta “a mellorar a cobertura da liña telefónica e Internet para avanzar no camiño de facilitar o acceso á administración por vía telefónica e dixital aos veciños do rural lucense”.
