A subdelegada do Goberno en Lugo, Isabel Rodríguez, lamentou que a Xunta de Galicia siga tendo unha actitude “completamente irresponsable” e actúa “con insolvencia ou mala fe” ao “pór en dúbida” os avances no viaduto da A-6.
Así, tal como recolle a Subdelegación nun comunicado, Rodríguez lembroulle á conselleira de Infraestruturas, Ethel Vázquez, que unha actuación como a de reconstrución desa ponte “vai por procedemento de emerxencia”, polo que non fai falta a súa inclusión nos Orzamentos Xerais do Estado.
“A conselleira tería que coñecer, como responsable pública e especialmente pola súa formación profesional, que un procedemento de emerxencia é moito máis rápido e flexible para a execución dunha actuación deste tipo”, subliñou Rodríguez, quen insistiu en que o Executivo se comprometeu a investir “todo o que faga falta e cando faga falta” para estes traballos.
Isabel Rodríguez engadiu que cada vez que o Goberno autonómico pon estas actuacións en dúbida, “pon en dúbida tamén o traballo dos empregados e os técnicos, non só do Ministerio, senón tamén da súa Consellería, cos que se consensúan cada un dos avances”.
Para a subdelegada do Goberno en Lugo a actitude de Vázquez resulta “ridícula” e “pon en dúbida a súa credibilidade”.
Na mesma liña falou o portavoz do PSdeG no Parlamento de Galicia, Luís Álvarez, quen pediu á Xunta que explique as declaracións públicas do seu ex delegado territorial en Lugo e actual deputado José Manuel Balseiro, quen sementou dúbidas sobre a seguridade das actuacións no viaduto da A-6.
Así, Álvarez lamentou esta “mostra de imprudencia” fronte á actuación do Executivo, o que demostra, ao seu xuízo, que “para un problema gravísimo están a cuestionar todo”, mentres que “non ten alternativas” para o derrube da estrada LU-651 no Courel.
